MAMASUHI BAGAS

PARTANGIANGAN MAMASUHI BAGAS

KEL. F.R. HARAHAP / Br PURBA

1.      Marende BE No.188:1 “Jahowa Siparmahan Au”

Jahowa siparmahan au, ndang hurang manang aha

Ai nasa jea dipadao, do sian dorbiana

Tongon dibaen na lomak i, laho pangoluhon tondingki

Dibaen asi rohana

2.      Panindangion  (Ket : U = Uluan, NB = Nampuna Bagas, H = Huria )

U = Tutu Jahowa do namarmahani ngolunta, Ibana namanarihon jala patongon nasa naringhot di ngoluntaon. Antong aha ma dohonon ni keluarga dibagasa ombasan ...

NB = Sian asi dohot holong ni roha ni Jahowa do hupungka jala hupasidung hami pembangunan ni bagas on. Mauliate ma di Debata ! di pasu-pasu Tuhan i ma hami saluhutna pangisi ni bagason, dipasu-pasu nang ianakhonnami

H = Bagas pangalapan tua, pasu-pasu jala hasonangan ma bagas on di hamu tumpahan ni Debata marhite-hite Tuhan Jesus Kristus Amen

3.      Marende Huria No. 464 : 1-2 “ Huboan ma diringku”

Huboan ma diringku, Tuhan hibul tu Ho / Ai au do tinobusMu, umbaen tarbaen au ro, pagalak ma rohangku, dison managam au / TondiMi ma suru, na boi manggomgom au

Ho sipalua au, sun hinagooMi / HataM do huhaposi, na so boi muba i / pagalak ma rohangku .....

4.      Votum

U = marhitehite Goar ni Debata Ama, dohot Goar ni Anakna Tuhan Jesus Kristus, dohot Goar ni Tondi Parbadia, na Tumompa langit dohot tano on

H = Amen

U = pelehon ma tu Debata Hamauliateon, jala garari ma angka baga bagami tu na tumimbul i . manang ise na mamelehon hamauliateon, ido na pasangap ahu, jala na mambahen lapang, asa hupatuduhon di ibana hatuaon ni Debata Haleluya.

H = (Mangendehon...) Haleluya... haleluya.. haleluya

U = Martangiang ma Hita ! Ale Debata Amanami pardengganbasa nasumurung i ! na ro do hami tu JoloM mamboan puji-pujian dohot mauliate ni rohanami tu adopanMu. Apala di tingki on dilehon Ho Do di hami las ni roha, hahipason, dohot gabe ni angka na niula. dipasu-pasu Ho do hami sonang sohariboriboan, mardame-dame, jala mardenggan di angka parsaoran siganup ari. Tung balga do las ni rohanami, siala bolas do keluarga on ro di ianakhon nasida mamasuhi bagas na uli on. Sai inganan pangalapan tua, pasupasu jala hadameon na sian Ho ma bagas on di hami saluhutna, dao ma na mambahen parmaraan, songgot songgot, manang parsahiton di hami sude

NB = patongon ma Tuhan tu hami hombar jabu dohot dongan sahuta ro di ale-ale na marsihohot di hataM di luat on. Tambai ma pansarian dohot pangabahan natama asa lam tau hami mamuji pasangaphon ho, marhite hite Jesus Kristus TuhanNami

H = paingot ma hami saluhutna ale Tuhan Jahowa,asa unang holan arta portibion huringkoti hami, alai asa lam mangarade hami di bagas nasumurung di banuaginjang naung pinaradeMi, so targagat ni ngitngit dohot tasik, dibagasan goar ni Jesus Kristus Tuhannami. Amin

5.      Marende Huria No. 518 : 2+4 “ Marsinondang dibahen Jesus”

Nang au on na dao najolo, di na holom lilu au / alai sondang ni Tuhanku do mamboan mulak au/ tapagalak palitonta, ta patiur dalan i / ai torop dope na lilu, sai hatop ma mulak i

Dongan, so tung mintop lampu na ringkot tu dongan i / so tung mago angka jolma dibaen halembaonmi / tapagalak ...

6.      Litany sipaingot tu nampuna bagas

U = Di na marlas ni roha hita di bagason tama do pahusorhusoron ni rohanta poda ni Debata tu angka naung tarpasupasu di ngolu saganup ari, dohot napauli angka bagasna songon na tarsurat di 5 Musa 8:11-20 “ Antong ramoti hamuma dirim, asa unang lupa roham di Jahowa, Debatam, gabe ndang diradoti ho angka tonaNa i, uhumna dohot aturanNa, angka na hutonahon i tu ho sadarion

H : Asa, ia dung mangan ho jala bosuron, jala dipauli ho angka bagas na uli di ingani ho. Tole lombum, dohot biru birum lam sinur jala ganda perak dohot sere di ho, ganda saluhut di Ho. Hape lam dipaginjang ho roham jala lupa ho di Jahowa Debatam na mangalehon pasupasu i di ho

U = Ibana manogu nogu ho di halongonan bolon na jorbut, inganan ni ulok tulong api dohot naga dohot hala, tano hasang huhut naso marisi aek. Ibana tahe paruarhon di ho aek sian dolok batu na pir sahali

H = Ibana mangalehon ho mangan manna na so tinanda ni ompum, asa ibana paserep roham dohot mangunjuni ho, asa marhasonangan ho bahenonNa di ujung

NB = asa unang dohononku di bagasan rohangku, gogongku sandiri dohot huaso ni tanganku mangomo angka arta i , asa pahothon padanNa naung niuarihonNa tu angka ompum, sonon andar sadarion

U = alai tung sura lupa roham di Jahowa, Debatam, jala diihuthon ho debata sileban huhut mangoloi marsomba tu ganaganaan, ajiajian dohot sumangot ni ompum, hatindanghononku hian ma tu hamu sadarion, ingkon  mago situtu hamu !

H = songon bangso parbegu angka naung niago ni Jahowa maradophon hamu, suang songon ima hamu mago, molo so ditangihon hamu soara ni Debatamunai

NB = Sai ditangihon jala dipeop rohanami ma saluhut tona ni Debata na hujalo hami sadarion. Jala dipargogoi ma hami na saripe manghamauliatehon pasupasu ni Debata, bahen sangap di GoarNa na badia i !

7.      KOOR REMAJA + Naposo Bulung

8.      Marende sian BE No.695 : 1 “Jesus Tuhanku di Ho ma Au on”

Jesus Tuhanku di Ho ma au on, asa mangihut tu Ho au tongtong / Gohi rohangku ingani au on, sonang si Ho tongtong

O Tuhan togu ma au, o Tuhan togu-togu ma au / gohi rohangku ingani au on, sonang di Ho tong-tong

9.      Renungan

10. Marende No. 658 : 1-2 “ tu portibion na rundut”

Tu portibion na rundut borhat ma ho . Galak bahen palitomu sai dungo ho / boan sondang tu na holom mangurupi namardangol / i do baritana ulu ni Kristus i

Hata i baen sitiopan di dalanmi / Kristus i bahen panungkunan di ngolumi / sai radoti hatigoran holong dohot hasintongan / sasada Debatanta haposi ma

11. Martangiang mangondihon nampunasa bagas

U = ale Tuhan Debata, Parasiroha masumurung ! mauliate ma rohanami tu Ho, ala godang ni asi dohot holong ni roham. Diurupi ho do keluarga on laho pauli bagas na uli sian na mamungka sahat tu na paujunghonsa. Ndang tagamon so godang halojaon, parungkilon, dohot holso ni roha laho papungu-pungu sinamot na ringkot tu pembanguna  bagas on, ndada tung so humasusa pingkiran nasida alai tung dipasingkop Ho do saluhutna, gabe di impos jala sirsir saluhutna songon na hubereng hami nuaeng. Pasu-pasuM do i Tuhan, jala hupuji hami ma GoarMu alani saluhutna i !

NB : Ale Tuhan, di Ho ma puji-pujian nami ari on ro di saleleng-lelengna !

U : di naung hubongoti hami bagas on sadarion, hupasahat jala hupagomgomhon hami ma tu Ho saluhutna pangisi ni bagas on, mulai sian na metmet sahat ro di na magodang. Mian ma Ho dibagason marhite-hite TondiM, ramoti ma nasida mangingani bagas nauli on.

NB : suru ma Tondi Parbadia i tu ganup hami pangisi ni bagas on, asa jumpang hami dame, las ni roha, parsaoran na tama, asa masa di hami holong na marsihaholongan marhite-hite Goar ni Jesus Kristus, TuhanNami

U : Tangiang Ale amanami – Tangiang pasu-pasu....